Surah Qaf

ق

قرآن مجید کی قسم کہ محمد پیغمبر خدا ہے ‏

لیکن ان لوگوں نے تعجب کیا کہ ان ہی میں سے ایک ہدایت کرنے والا انکے پاس آیا

تو کافر کہنے لگے کہ یہ بات تو (بڑی) عجیب ہے ‏

بھلا جب ہم مر گئے اور مٹی ہوگئے (تو پھر زندہ ہونگے؟ )

یہ زندہ ہونا (عقل سے) بعید ہے ‏

انکے جسموں کو زمین جتنا (کھا کھا کر) کم کرتی جاتی ہے ہم کو معلوم ہے

اور ہمارے پاس تحریری یادداشت بھی ہے ‏

بلکہ (عجیب بات یہ ہے کہ) جب انکے پاس (دین) حق آپہنچا تو انہوں نے  اس کو جھوٹ سمجھا تو یہ ایک الجھی ہوئی بات میں  (پڑ رہے) ہیں

کیا انہوں نے اپنے اوپر آسمان کی طرف نگاہ نہیں کی کہ

ہم نے اس کو کیونکر بنایا اور (کیونکر) سجایا اور اس میں کہیں شگاف تک نہیں ‏‏

اور زمین کو (دیکھو اسے) ہم نے پھیلایا اور اس میں پہاڑ رکھ دئیے

اور اس میں ہر طرح کی خوش نما چیزیں اگائیں ‏

تاکہ رجوع لانے والے بندے ہدایت اور نصیحت حاصل کریں ‏

اور آسمان سے برکت والا پانی اتارا

اور اس سے باغ و بستان اگائے اور کھیتی کا اناج‏

اور لمبی لمبی کھجوریں جن کا گھابہ تہ بہ تہ ہوتا ہے‏

(یہ سب کچھ) بندوں کو روزی دینے کے لئے (کیا ہے)

اور اس (پانی) سے ہم نے شہر مردہ (یعنی زمین افتادہ) کو زندہ کیا

(بس) اسی طرح (قیامت کے روز) نکل پڑنا ہے ‏‏

ان سے پہلے نوح کی قوم اور کنوئیں والے اور ثمود جھٹلا چکے ہیں‏

اور عاد اور فرعون اور لوط کے بھائی ‏‏

اور بن کے رہنے والے اور تبع کی قوم

(غرض) ان سب نے پیغمبروں کو جھٹلایا تو ہماری وعید (عذاب) بھی پوری ہو کر رہی ‏‏

کیا ہم پہلی بار پیدا کر کے تھک گئے ہیں؟

نہیں بلکہ یہ از سر نو پیدا کرنے میں شک میں (پڑے ہوئے) ہیں ‏

اور ہم ہی نے انسان کو پیدا کیا ہے اور جو خیالات اس کے دل میں گزرتے ہیں ہم انکو جانتے ہیں

اور ہم اس کی رگ جان سے بھی اس سے زیادہ قریب ہیں‏‏

جب (وہ کوئی کام کرتا ہے تو) دو لکھنے والے جو دائیں بائیں بیٹھتے ہیں لکھ لیتے ہیں

کوئی بات اس کی زبان پر نہیں آتی مگر ایک نگہبان اس کے پاس تیار رہتا ہے‏

اور موت کی بےہوشی حقیقت کھولنے کو طاری ہوگئی

(اے انسان) یہی (وہ حالت) ہے جس سے تو بھاگتا تھا ‏‏

اور صور پھونکا جائے گا

یہی (عذاب کے) وعید کا دن ہے ‏‏

اور ہر شخص (ہمارے سامنے) آئے گا ایک (فرشتہ) اسکے ساتھ چلانے والا ہوگا اور ایک (اس کے عملوں کی)  گواہی دینے والا ‏‏

(یہ وہ دن ہے کہ) اس سے تو غافل ہو رہا تھا

اب ہم نے تجھ پر سے پردہ اٹھا دیا تو آج تیری نگاہ تیز ہے ‏

اور اسکا ہم نشین (فرشتہ) کہے گا کہ یہ اعمال نامہ میرے پاس حاضر ہے ‏

(حکم ہوگا کہ) ہر سرکش ناشکرے کو دوزخ میں ڈال دو ‏‏

جو مال میں بخل کرنے والا حد سے بڑھنے والا شبے نکالنے والا تھا ‏

جس نے خدا کے ساتھ اور معبود مقرر کر رکھے تھے تو اس کو سخت عذاب میں ڈال دو ‏‏

اس کا ساتھی (شیطان) کہے گا کہ اے ہمارے پروردگار میں نے اس کو گمراہ نہیں کیا تھا بلکہ یہ آپ ہی راستے سے دور بھٹکا  ہوا  تھا ‏‏

(خدا) فرمائے گا کہ ہمارے حضور میں ردوکد (جھگڑے کی بات) نہ کرو  ہم  تمہارے پاس پہلے  ہی  (عذاب کی)  وعید بھیج چکے تھے ‏

ہمارے ہاں بات بدلا نہیں کرتی اور ہم بندوں پر ظلم نہیں کیا کرتے ‏

اس دن ہم دوزخ سے پوچھیں گے کہ کیا تو بھر گئی؟

وہ کہے گی کچھ اور بھی ہے؟ ‏‏

اور بہشت پرہیزگاروں کے قریب کر دی جائے گی (کہ مطلق) دور نہ ہوگی ‏

یہی وہ چیز ہے جس کا تم سے وعدہ کیا جاتا تھا (یعنی) ہر رجوع لانے والے حفاظت کرنے والے ‏ سے‏

جو خدا سے بن دیکھے ڈرتا رہا اور رجوع لانے والا دل لے کر آیا ‏‏

اس میں سلامتی کے ساتھ داخل ہو جاؤ

یہ ہمیشہ رہنے کا دن ہے

وہاں وہ جو چاہیں گے انکے لئے حاضر ہے اور ہمارے ہاں اور بھی (بہت کچھ) ہے‏

اور ہم نے ان سے پہلے کئی امتیں ہلاک کر ڈالیں وہ ان سے قوت میں کہیں بڑھ کر تھے

وہ شہروں میں گشت کرنے لگے کہ کیا کہیں بھاگنے کی جگہ ہے؟ ‏‏

جو شخص دل (آگاہ) رکھتا ہے یا دل سے متوجہ ہو کر سنتا ہے اس کے لئے اس میں نصیحت ہے ‏‏

اور ہم نے آسمانوں اور زمین کو اور جو (مخلوقات) ان میں ہے سب کو چھ دن میں بنا دیا

اور ہم کو ذرا بھی تکان نہیں ہوا ‏‏

تو جو کچھ یہ (کفار) بکتے ہیں اس پر صبر کرو

اور آفتاب کے طلوع ہونے سے پہلے اور اسکے غروب ہونے سے پہلے اپنے پروردگار کی تعریف کے ساتھ تسبیح کرتے رہو ‏‏

اور رات کے بعض اوقات میں بھی اور نماز کے بعد بھی اس (کے نام) کی تنزیہہ کیا کرو ‏‏

اور سنو جس دن پکارنے والا نزدیک کی جگہ سے پکارے گا ‏‏

جس دن لوگ چیخ یقینا سن لیں گے

وہی نکل پڑنے کا دن ہے ‏

ہم ہی تو زندہ کرتے ہیں اور ہم ہی مارتے ہیں اور ہمارے پاس ہی لوٹ کر آنا ہے ‏‏

اس دن زمین میں ان پر سے پھٹ جائے گی اور وہ جھٹ پٹ نکل کر کھڑے ہو نگے

یہ جمع کرنا ہمیں آسان ہے ‏‏

یہ لوگ جو کچھ کہتے ہیں ہمیں خوب معلوم ہے

اور تم ان پر زبردستی کرنے والے نہیں ہو

پس جو ہمارے (عذاب کی) وعید سے ڈرے اسکو قرآن سے نصیحت کرتے رہو

***********