Surah Al Tariq

آسمان اور رات کے وقت آنے والے کی قسم ‏ ‏

اور تم کو کیا معلوم کہ رات کے وقت آنے والا کیا ہے؟ ‏

وہ تارا ہے چمکنے والا ‏

کہ کوئی متنفس نہیں جس پر نگہبان مقرر نہیں ‏

تو انسان کو دیکھنا چاہیے کہ وہ کاہے سے پیدا ہوا ہے ‏‏

وہ اچھلتے ہوئے پانی سے پیدا ہوا ہے ‏‏

جو پیٹھ اور سینے کے بیچ میں سے نکلتا ہے ‏‏

بیشک خدا اس کے اعادے (یعنی پھر پیدا کرنے) پر قادر ہے ‏‏

جس دن دلوں کے بھید جانچے جائیں گے ‏

تو انسان کی کچھ پیش نہ چل سکے گی اور نہ کوئی اس کا مددگار ہوگا ‏

آسمان کی قسم جو مینہ برساتا ہے ‏

اور زمین کی قسم جو پھٹ جاتی ہے ‏

کہ یہ کلام (حق کو باطل سے) جدا کرنے والا ہے۔ ‏

اور بیہودہ بات نہیں ‏‏

یہ لوگ تو اپنی تدبیروں میں لگ رہے ہیں ‏‏

اور ہم اپنی تدبیر کر رہے ہیں

تو تم کافروں کو مہلت دو بس چند روز ہی مہلت دو۔ ‏

***********

Visits wef Apr 2024